بلدى
-تركيبتك الغريبة هي سرك اللي بيتحل لما نقول (والله فيكي حاجات حلوه) .. حاجات حلوه متأجله .. حاجات حلوه مستنيه فارس على حصان أبيض يحررها من الأسر .. حاجات حلوه متجمده جوه التلاجه مستنيه الإيد اللي تتمد علشان تطلعها ..
تركيبتك الغريبة هي سر دفاكي في عز برد الشتا.
- تركيبتك الغريبة هي سر نسمة صيفك في عز الحر.
- تركيبتك الغريبة هي سر حنيتك رغم قسوتك.
- تركيبتك الغريبة هي سر علمك رغم جهلك.
- تركيبتك الغريبة هي سر انتصارك رغم هزيمتك.
تركيبتك الغريبة اللي مخليانا دايماً ماشيين بالتكاله ومش عاملين حساب لأي حاجه.
- تركيبتك الغريبة اللي مخليانا دايماً فاكرينلك كل حاجه وحشه وناسيين الحلو اللي فيكي
- تركيبتك الغريبة هي اللي بتخلي الفلاح الفقير يسكن على شط النيل اللي ساكن على شطه التاني الوزير.
أيوه يا مصر .. فيكي زحمه .. فيكي تلوث .. فيكي كوسه .. فيكي نداله وقلة أصل .. فيكي العبر.
لكن طيبة أهلك شيء غريب .. هوا ليلك شيء غريب .. مياه نيلك شيء غريب .. خفة دمك شيء غريب، مفيش حد في الدنيا زي أهلك، مفيش حد في الدنيا بيضحك على مشاكله زينا، مفيش حد في الدنيا بيصبر على حاله زينا.
"على قلبى وقلب ولدى زى العسل يا بلدى"
"أميرة الصمت"
موضوع: بلدى........ 
الإثنين 29 نوفمبر 2010 - 18:59
