طريق السعادة ... هااااااااااااااااااااااااااااااااام جدا

السلام عليكم ورحمة الله وبركاته
حبايبي الغاليين ....
أظن إن الوقت دلوقتى مناسب أوى إنى أختم موضوعين كنت فتحتهم فى أول دخولى المنتدى الجميل دا ( منتدى سنحيا بالقرآن ) المنتدى اللى لقيت فيه ناس جميلة اوى مالقيتهمش فى حته تانية .. وأشخاص بجد مميزين ربنا يوفقكم كلكم أنا بجد فخور بوجودى فى وسطكم...
أنا بصراحة مش من هواة كتابة مواضيع كتير ولا بحب حد يكتب مواضيع كتير أوى ... بحب أكتر من كدا إننا نكتب موضوع واحد ... بس يغير قناعة أو يكسب معلومة أو يدي مهارة.. أو التلاتة سوا ... تعرفوا ... فى ناس كتير أوى أنا واحد منهم ... إتغيروا بكلمة... وناس دخلوا الجنة عشان كلمة ... وناس اترموا فى النار عشان كلمة ( رب كلمة يلقيها صاحبها لا يلقى لها بالا تهوى به فى النار سبعين خريفا ) دا حديث للرسول صلى الله عليه وسلم .
أظن جه الوقت دلوقتى انى اتكلم شوية عن الموضوعين سوا .. موضوع عايز تكون سعيد ؟؟وهادمجه مع موضوع عايش وللا مش عايش ؟؟ لأنهم بصراحة موضوع واحد ...
تفتكروا.. الأول إيه هيا السعادة ؟؟ كلكم جاوبتم إجابات رائعة وصحيحة لكنها مش فى الهدف بالظبط ... فى اللى قال ان السعادة فى راحة الضمير .. وفى اللى قال إنها فى النجاح .. ورضا الوالدين .. وفى اللى قال إنها فى طاعة الله والقرب منه ... وفى اللى قال هيا المتعة ولمة الصحاب والفسح والخروجات والفرفشة .. وهكذا .. وارجعوا للموضوع وهتلاقوا كل الكلام وكلام تانى كتير ,,,وكله جميل أوى ... لكن كل اللى اتقال دا عبارة عن حاجات بتجيب السعادة ... لكن مش هيا كل السعادة ... وخلينى اتفق مع قطر الندى ورحيق الجنة فى نقطة قالوها إن السعادة المطلقة موجودة بس فى الجنة ... دا كلام صح تماما بدليل هما قالوه إن ربنا قال (( ولقد خلقنا الإنسان فى كبد ))وطبعا الدنيا دار ابتلاء واختبار ..والاختبار والابتلاء حاجة متعبة ومقلقة ..فمفيش سعادة فى الدنيا .. خلينى هنا بأة أختلف معاهم .. واقول :
السعادة المطلقة الكاملة اللى ما بتقطعش أبدا موجودة عند الله سبحانه وتعالى فى الجنة ..ساعتها بس نقدر نرتاح ونروق تماما مفيش حاجة أبدا تخوف أو تقلق ... ساعتها يبقى ضمنا رضا ربنا ... وضمنا مصيرنا وهو الجنة ... اللهم إنا نسألك الجنة ( قولوا آمين ) .
لكن الطريق للسعادة طريق سعيد .. والسعادة فى الدنيا وإن كانت مش كاملة لكنها موجودة بالتأكيد .. وموجودة فى طريق واحد مش اتنين .. ممكن تبقى سعيد ... آه طبعا ممكن بكل سهولة ... بس الأول لازم تكون عايز تبقى سعيد ... إزاى هو فيه حد مش عايز يبقى سعيد ؟؟؟؟؟
أيوة فيه ؟؟؟
وهنا هاخد فاصل ... عشان أدعوكم وأرجوكم للمتابعة الجيدة ... الكلام دا لأول مرة أنا باكتبه ... ممكن بكرة يبقى كتاب يتباع فى المكتبات .. وممكن يبقى صعب عليا أقوله بالصورة دى وهنا فى وقت تانى .. عايزكم تعرفوا إنى أقتطعت من وقت نومى عشان أكتب الكلام دا .. وعايزكم تعرفوا إنى تعبت بجد عشان أقدر أجمعوا وأبحثوا وأخرجوا بصورة كلام بالعامية عشان يوصل لقلبك ... عشان كدة ركز أوى .. ودون ملاحظاتك واغتنم الفرصة ... ومتضيعش لحظة ... واقرا الكلام دا بتأنى مرة واتنين وتلاتة ... عشان توصل للسعادة إن شاء الله .. وخليك معايا فى طريق السعادة ...

إحناقولنا إن فى ناس كتير مش عاوزة تبقى سعيدة ... أيوة فى ناس بتحب نظرة العطف اللى بترميهالها الناس لما بتشتكى آلامها وبيتمنى من غير ما يدرى إن وجعه يزيد عشان تعاطف الناس يزيد ناحيته .. ودول ناس اساتذة فى الشكوى ... طبعا مش باقول ما تشكيش بس شوف بتشكى لمين وليه ؟؟.. بتفضفض عايز حد يطبطب عليك ؟؟... وللا بتشكى لحد أنت عارف إنه هيساعدك تتخطى أزمتك وتقف على رجلك ؟؟.. عشان كدا من النهاردة بطل شكوى ... جرب مرة تحل مشاكلك بدل ما أنت عمال تشكى وبس ... من النهاردة لما تشكى ... تشكى لحد يساعدك تغير .. وتحكى مشكلتك بصورة واحد عايز الحل عشان يجرى ناحيته ... وتسمع وتقيم وتقرر تحل مشكلتك فورا ... أوعة تعيش طول عمرك أسير لمشكلة ممكن تتحل بمنتهى البساطة وخلينى أقولك إن المشاكل كلها ليها حل .. بس أنت تقرر ... ولو أنت عندك أجمد مشكلة قولى عليها وشوف ليها حل وللا لاء ... وانا لو مش عارف إن إيدى هتوجعنى من الكتابة أنا كنت حكيتلكم 60 حكاية على الاقل لناس عندهم مشاكل ممكن تخلى ناس كتير تنتحر بلا مبالغة ... وحلوها .. وبأوا ناس عظيمة جدا ... ومعندهمش مشاكل تعطلهم عن السعادة ...
يبقى أول درس قرر تبقى سعيد وعشان تبقى سعيد ... لازم الأول تكون مؤمن بالله ... ومؤمن بذاتك وقدراتك .. إنك فعلا ممكن تحل كل مشاكلك بنفسك ... صحيح ممكن تحتاج مشورة أومعلومة أو زقة أو تحفيز ... لكن يفضل دايما القرار قرارك والحل عندك فى عقلك وفى قلبك وفى نفسك ...
اتعلم النقطة دى وشوف إزاى ترسمها فى حياتك وإزاى تعملها مع نفسك ... مش شرط يكون كلامى منطبق عليك 100% أنا مش حاوى ... لكن أكتر واحد يعرفك فى الدنيا ... هو أنت ...اكتر واحد عارف انت محتاج إيه .. هو أنت ... عشان كدة خد من كلامى الحافز خد منه اللى تقدر عليه وقرر تنفذه وتضيف عليه وتعدلوا على مقاسك ... واصنع حياتك ..وتعالى معانا على طريق السعادة ...

مشرف عدد المساهمات : 624 تاريخ التسجيل : 16/09/2010

صحيح ممكن تحتاج مشورة أومعلومة أو زقة أو تحفيز ... لكن يفضل دايما القرار قرارك والحل عندك فى عقلك وفىقلبك وفى نفسك ...
تمام
ربنا يدينا القوة بجد على اختيار القرارات الصائبة

كلام جميل جداً ... ومشوق جداً جداً ...
فى انتظار البقية .......
و جزاك الله خيراً ......

كلام رائع
متابعين بحماس
ومنتظرين الباقى

الإمام حسن البصري قال ( إنما انت أيام .. فإذا ذهب يوم ... ذهب بعضك ) ودى بالظبط القاعدة اللى احنا هنستخدمها النهاردة فى طريق السعادة .. الحاجة الوحيدة اللى مشتركة عند كل الناس هو خط الزمن ... كلنا نملك ماضى ... وحاضر .. ومستقبل إن شاءالله ...
عارفين إيه أكبر أسباب التعاسة فى العالم ... وارجعوا لإجابتكم وهتلاقوها دايما ضمن الحاجات اللى هنقولها حالا دى ...
دايما أسباب عدم السعادة ... يا إما حد عنده مشاكل فى الماضى واحباطات وقناعات وأحداث وتجارب .. بتسببله الألم كل ما يفتكرها .. وحاجات فى ماضينا أحيانا مؤلمة واحنا نظن إن احنا نسيناها .. لكنها ما اتنستش ومسببة لمسة حزن وانت نسيتها لكن أثرها موجود فيك لأنك ردمت على النار وهيا لسة مولعة فأول ما تلعب فى ترابها ترحع تولع فورا ... ماضى ... ماضي مسبب التعاسة لناس صح ؟؟ أكيد صح؟؟
وممكن ناس مدايقها الحاضر ... مش عارف يعيش صح ... عنده كوم مشاكل .. دخله مش مريحه ... حياته ملعبكة .. مش قادر يعيش ...
وناس تانية خوفها وقلقها اللى مسبب تعبها وعدم سعادتها هو المستقبل .. دايما خايف من المستقبل وخايف من بكرة ... هيتجوز ازاى وعياله هيسكنوا إزاى وهيشتغلوا إيه وياترى لو مراته طلبت منه طلب وهو مش معاه فلوس هيعمل إيه ( خدوا بالكم دا اصلا لسة ماخطبش حتى ) وهكذا ...
فكركم لو واحد ... ماضيه مشرق .. وبيعرف كويس أوى يتعامل مع الوقت الحاضر ... ومخطط للمستقبل كويس أوى ... ومش خايف منه وجاهز لأى حاجة ممكن تحصل
تفتكروا دا يبقى إيه ؟؟؟؟
ها؟؟؟
صح.. برافوا ... مظبوط .. دا يبقى سعيد ...
طيب ياللا نبدأ نبقى سعدا ... كله يجهز لتلات محطات ... هنتكلم باختصار .. هنفتح الطريق ونديك خريطة ومش هتستفيد أبدا إلا لو نفذت ... هندلك وانت عليك تمشى ... اول محطة الماضى ... هنتعلم منه وهنمسح كل مشاكله تماما ونحوله لدافع لينا للنجاح والتميز والسعادة ...
وبعدين هنروح للحاضر بكل قوة وهنستخدموا أحسن استخدام ... وبعدين نحقق فيه كل اللى بنحلم بيه ... ونحقق فيه معنى مهم جدا ... التوازن .. ودا سر سعادة أبدى فوق من رائع ...
وبعدين هنكون ساعتها وبكل قوة جاهزين نرسم مستقبلنا مليان أمل وسعادة .. وبعدها هاكون معاكم دايما فى أى سؤال أو استشارة فى أى موضوع .. عشان أساعدكم توصولوا للسعادة.. وانتم تساعدونى فى إنى أكون سعيد بإسعادكم باختصار لأن دى رسالتى ... السعادة لنفسي وللعالم ... وانا عارف كويس أوى تيجى إزاى
وعايز أقولكم إنى مش أحسن من أى حد فيكم .. بالعكس ممكن يكون كتير فيكم يفوقونى بمراحل.. لكنى حابب أنى أنفع غيرى وأنفع نفسي ... وبادعوكم كلكم لدا .. من أسعد لحظات حياتك .. أن ترسم البسمة على وجوه الآخرين ... وياللا نبدأ رحلة السعادة ... معاك.. معاكى ... معانا ... فى طريق السعادة

ان شاء الله هتابع معاكم واشوف السعادة معاكم

ميرسي اوووي يا استاذ بجد قلبك على غيرك دايما

ما تقوليش يقيت اعرف ارد cheers

ماضى وحاضر ومستقبل .............
ياه لما يكون كله عاوز تظبيط ......
"تسجيل متابعة قوى شديد اللهجة "
ويــــــارب ارزقنا جميعا السعادة الحقيقية .....

أنا عايز تركيز جامد
وخليكوا واثقين إننا لو نجحنا فى الرحلة دى ممكن نغير كل حياتنا بمنتهى السهولة

هارجع بكرة باوول مرحلة

المــــــــــــــــــــــــــــــــــــــــــــاضي

ياللا نقول مع بعض ... يازمان إرجع

جزاك الله خيرا

تمام يا استاذ مصطفى
وان شاء الله متابعين اول باول
جزاك الله كل خير

جـــــــزاك الله خيرا
وان شاء الله نكون من المتابعين

أول خطوات السعادة زى ما قولنا هيا فعلا إنك تمتلك ماضى سعيد خالى من الإحباطات والذكريات السلبية واى حاجة ممكن تعطلك عن النجاح والتميز والسعادة وعشان ننضف الماضي تماما .. لازم نعرف بالظبط إيه المشاكل او التحديات اللى موجودة فيه ...ودا طبعا صعب هنا لكن خلينى أعتمد عليكم أنتم فى الموضوع دا وعلى قوة تركيزكم وذكاء كل واحد فيكم ... عايز كل واحد يبقى طبيب نفسه وموجهها هنقول كلام يشمل كل حاجة .. وانت تاخد اللى يناسبك وتبدع فى تطبيقه لحد ما توصل لماضى يدفعك لقدام مايعطلكش ثانية واحدة ... عشان كدا خلينا الأول نتفق إن الماضى دا بكل إحباطاته وذكرياته الأليمة وأحداثه اللى هيا كانت ضدنا ساعتها ما هو إلا مجموعة من الحبال اللى رابطاك فى كرسي ومانعاك من إنك تقوم تحقق طموحاتك أو حتى تحلم بيها .. كل موقف سلبي زمان أنت فاكر إنك نسيته... لكن هو فى الحقيقة السبب الرئيسي اللى بيخليك أحينا زعلان وأنت مش عارف من إيه .. أو هو سبب سلوك أو شعور سلبي عندك دلوقتى ..أو هو اللى مسبببلك الخوف والقلق والتوتر والعصبية .. أو أو أو ... يبقى إيدك فى إيدى وبكل عزمك وقوتك اللى ربنا رزقك بيها .. وياللا نفك الحبال عشان نقوم ..ورانا حاضر ومستقبل عايزين نملاهم بالنجاح وبالسعادة ... تعالوا بأة نقسم الماضى بتاعنا لعدة أقسام مش هيخرج أبدا عن حاجة من الحاجات دى ... واحنا طبعا بنتكلم عن مشاكل الماضي مش نجاحاته والحاجات السعيدة اللى فيه لأن أظن دى مفيش فيها مشكلة أبدا ..
يبقى الماضى بنقسمه إلى :
أولا :: وأهم شيء هو الآراء والمعتقدات اللى كونتها عن نفسك زمان سواء نتيجة لتجربة غير ناجحة من وجهة نظرك أو... من آراء الآخرين فيك :ـ
يعنى ممكن فى ماضيك تكون أتعرضت لنقد او توجيه سلبي من حد سواء أخ ليك أو احد الوالدين أو مدرس أو صديق أو ... يكون قالك فى مرة مثلا ( أنت فاشل ـ أنت خجول جدا ـ ياه دا انت عصبي جدا ـ أنت مفيش منك رجا ( فايدة ) ـ هتفضل طول عمرك كدا ....) ودى قناعات الآخرين كرروها قدامك لكن أنت ما كونتش قوى كفاية عشان تواجهها وتقيمها وتمنع تأثيرها عليك ..
ـ ممكن كمان تكون انت اتعرضت لموقف إنك كنت مصاحب حد وبعدين عمل معاك موقف وحش او عرفت حد ملتزم وبعدين لقيته غير الظاهر او انخدعت فى مكان او خضت تجربة غير ناجحة فقمت اتولدت عندك قناعة أن كل الملتزمين وحشين وخاينين وظاهرهم غير باطنهم أو كل الستات مش عارف إيه أو العكس .. أو تقول أنا خلاص يظهر أنى ماأنفعش اقود مجموعة أنا جربت وفشلت .. او تقول يظهر أن دا آخرى .. أو أنا عارف حظى.. وكل الكلام اللى ممكن يتقال عشان يهدمك ... وكل إحساس أو قناعة سلبية أتولدت عندك نتيجة موقف سلبي.
وهكذا.. يبقى إحنا كدا بنتكلم عن القناعات السلبية اللى جاتلنا من الآخرين أو من أنفسنا نتيجة تجربة غير ناجحة ... أيوة كويس إيه الحل يعنى ؟؟؟
الحل سهل .. هاقولك مجموعة قواعد لازم تطبقها على كل اللى فات وتطبقها من هنا ورايح على كل حياتك اللى جاية إن شاء الله ..
1ـ لا تعمم ..
2ـ لا تحكم على نفسك
3ـ رأي الآخرين فيك لا يدل عليك ولن يدل عليك دا إن دل بيدل على وجهة نظر الشخص اللى قال الكلام مش بالضرورة رأيه فيك صح حتى لو كان مين .
4ـ ليس هناك شيء إسمه الفشل هنا فقط خبرات وتجارب
واحد طبعا على طول هيقولى انا مش فاهم ولا حرف .. وواحد تانى ذكى هيقول انا فاهم بس دا كلام نظرى واحنا عايزين حاجة ملموسة نعملها ...
أنا هاقوم قايل .. بس أصبروا عليا شوية وانا هرضى جميع الأزواق إن شاء الله.
إحنا ياجماعة طريقنا فى علاج النقطة دى من الماضي هو تغيير الإدراك يعنى أنك تفكر بطريقة مختلفة .. لأن طول ما أنت بتفكر بنفس الطريقة هتبقى أفعالك بنفس الطريقة..وهتبقى دايما نتايجك نفس النتايج ...
اللى هنعمله إننا هنغير طريقة تفكيرنا للأبد بدل ما نفكر تفكير يكون ضدنا .. نفكر تفكير لصالحنا .. بدل ما نهدم نفسنا هنبنيها .. ياللا بأة مع بعض نغير أسلوبنا فى التفكير ونغير قناعتنا ونرجع للماضي ونبتدى نعرض عليه كل حاجة سلبية عندك ومش هنرجع إلا ما نتخلص من النقطة دى تماما ونلغى تلت الماضي السلبي أو كله عند بعض الناس ...
طيب نرجع لموضوع تغيير القناعات ودى نقطة مهمة وهنناقش سوا النقط اللى إحنا قولناها ونرسم حياتنا من جديد .. عشان كدة عايزين نركز جدا ونسمع الكلام الجاي دا ونحس بيه ونعرضه على قلوبنا وعقولنا ونقراه مرة واتنين وتلاتة لحد ما نغير إدراكنا تماما...
إتفقناوللا إيه ... أكيد اتفقنا .. ومين نفسه ما يوصلش لنتيجة بالجمال دا بمنتهى السهولة.. ودا بالمناسبة أقوى الأساليب فى العالم .
نبدأ
ـ لا تعمم .. أحيانا الواحد فينا يتعرض لموقف من حد معين مصري من الشرقية مثلا .. مش معنى كدا إن خلاص كل أهل لشرقية وحشين .. ومش معنى كدا إن كل المصريين وحشين .. مصر فيها 80 مليون بنى آدم .. والعالم فيه مليارات ..قابلت منهم كام واحد عشان تعمم وتقول الناس ما بقاش فيها خير .. فكر كدا ... هتقول بس دا انا كل اللى قابلتهم فى حياتى مش عارف عاملين ايه؟؟ .... هاقولك كام واحد يعنى؟؟؟ مليون ؟؟ مستحيل طبعا .. لكن خلينى أقولك ما تعممش الموقف دا بيوصف فى واحد بس أوعى تعمموا على كل الناس لان دا شيء يضرك ويعطلك ويأذي ماضيك ... وفكر وشوف فى كام حاجة ضاعت منك عشان قناعة زى دى .. وكام فرصة كانت قدامك وانت خسرتها بسبب أنك بتعمم .. متعممش أبدا ..حتى الرسول صلى الله عليه وسلم بيقول (( من قال هلك المسلمين فهو أهلكهم ..))يعنى لو قناعاتك عن الناس كلها إنهم وحشين ... لا .. يبقى استوب .. وبص لنفسك المشكلة فيك ... خلينا نتفق إننا ما نعممش ..لأن دا ببساطة فى مصلحتك .
ـ لا تحكم على نفسك ... مش معنى إنك ما نجحتش فى تجربة إنك شخص فاشل أو أنك خلاص ما ينفعش تحاول تانى .. النملة اللى كانت سبب فى نصر جيش .. عارفين القصة ؟؟ لما جيش اتهزم فى معركة والقائد كان قاعد جنب شجرة وهو فى قمة اليأس وبعدين شاف نملة شايلة حبة قمح طالعة شجرة وكل لما توصل لآخر الشجرة تقع الحبة .. تقوم النملة تنزل وراها وكررت الموضوع دا 59 مرة .. الراجل قال النملة ما يأستش 59 مرة وانا سلمت من أول مرة ..فقام وخد الجيش وطلع بيه وانتصر بسبب إيه ؟؟ .. واحد بيقول بسبب نملة .. لا مش صح طبعا .. لكن بسبب إنه اتعلم وغير قناعاته وغير تفكيره فحصل على نتايج مختلفة ...أوعى تحكم على نفسك .. أوعى تقول أنا وبعدين تقول حاجة سلبية .. العقل الباطن بياخدها وبيعينها وبيطلعهالك وانت محتاج كل ذرة من ذرات ثقتك بنفسك عشان يهدمك بيها تماما ويضيع بيها آمالك وطموحاتك وأحلامك ... ها قررت إيه .. بلاش حد باة يقول أنا عصبي .. أنا خجول أنا فاشل انا مابعرفش أقود فريق عمل .. أنا انا أنا أناوبعدين بلاوى بعدها ... ومستغرب أنت ليه مش عارف تقف وتحلم ... لا ما تستغربش ..غير تفكيرك .. حياتك تبتسم .. واعرف كويس أنت أعظم مخلوق ربنا وجده على الأرض ..أنت اللى ربنا سخر ليك السموات والأرض .. وربنا جعلك ليه خليفة .. وحط كل الكرة الأرضية أمانة فى رقبتك .. أنت إنسان فريد من نوعه .. ما كانش زيك حد ولا هيكون ..بص لقدام وخلى حكمك على نفسك أكتر من كدا إيجابية
ـ رأى الآخرين فيك لا يدل عليك ولن يدل عليك .. أيوة قول لنفسك كدا مش معنى أن حد قالك أى كلمة عنك يبقى خلاص أصبحت عقيدة عندك من غير ما تحس .. يمكن زمان لأنك كنت صغير .. وضعيف .. لكن اليوم انت قوى .. وتقدر تقيم كل الكلام وكل القناعات السلبية اللى اتنقلت ليك من الآخرين ..أنت مش كدا .. ولو كدا أنت ممكن بمنتهى القوة تتغير لأنك تقدر .. عارف ليه؟.. لأنك إنسان .. خلى اللى يقول يقول دا لو بيعبر أكيد عن حد فابيعبر عن وجهة نظر اللى بيقوله مش بالضرورة يكون بيعبر عنك ... عشان كدا قيم كل الآراء السلبية اللى كانت سبب في هزيمتك قبل كدا .. وأصنع نجاحك بنفسك .. ومهما كانت صعوبة الرأى أو الأسلوب اللى بينتقدك .. حوله أنت لدافع ليك عشان تثبت للدنيا كلها أنك عظيم ورائع وسعيد.. وانت فعلا كدا .
ـ ليس هناك شيء يدعى الفشل هناك فقط خبرات وتجارب ...

ودى لازم تفهم منها إن أى تجربة غير ناجحة فى الماضى ما اسمهاش فاشلة ... إسمها تجربة ودرس انت اتعلمته ... تخيل لو كل الإخفاقات اللى فى حياتك حولتها انت بقوتك إلى دروس وعبر وحاجات تدعملك حاضرك ومستقبلك ... وهو دا فعلا الواقع ... أحد أغنى أغنياء العالم بيسألوه أنت إزاى عملت ثرتك؟؟ قال :: من خبرتى .. فسالوه وإزاى عملت خبرتك؟؟ .. قالهم من كل تجاربى الغير ناجحة .. توماس أديسون قبل مايخترع المصباح حاول على أقل الآراء 458 مرة فسألوه انت إزاى قدرت بعد فشل 458 مرة انك تنجح .. قالهم أنا ما فشلتش أبدا ..أنا اتعلمت 458 درس ... 458 طريقة مابتعملش المصباح الكهربي .. واحد تانى حاول يكتشف طريق جديد بين بلدين كانت النتيجة أنه تاه وتعب جدا وبعدين لما رجع .. قالوله فشلت ؟؟ قالهم لا .. أنا نجحت فى أنى أقول للناس أن الطريق دا طريق مش مناسب وأنا أكتر واحد ممكن يصدقوه فى الموضوع دا... عشان كدا حول كل إحباطك من تجاربك السابقة مهما كانت إلى نجاح وخبرة تدعمك فى الحاضر والمستقبل ..

وبكدة نكون عالجنا ( بس ) بطريقة التفكير تلت المشاكل اللى ممكن تكون موجودة فى الماضى ... باقى عليك تنفذ .. وباقى جزأين للماضى برضه هنتخلص من كل سلبياتهم بكل قوة .. وانت .. وانتى ... وانا .. وكلنا نقدر .. لأننا بشر .. إنسان .. ومش عايزين أكتر من كدا عشان ننجح ... ونحقق السعادة

ودايما أذكر نعمة ربنا عليك .. لأنك لو فهمت الكلام دا او أثر فيك فدا فضل ربنا علينا

عشان كدا ابتسموا وخليكوا معايا فى طريق السعادة ....

مشرف عدد المساهمات : 624 تاريخ التسجيل : 16/09/2010

لــــ نبتسم ابتسامه رضى
من الاعماق
على فكرة دى بتريح جدا
شكرا يا استاذ مصطفى ومتابعين معاك طريقنا للسعادة

فعلا حضرتك جبت الخلاصه بجد
اراء الناس
تجربه فاشله
موقف سئ
بس ان شاء الله
نحاول ننفذ الكلام اللى حضرتك قولته
شكرا جزيلا
متابعين بحمااااااااااااااااااااااااس

حد بيسال طيب لو الماضى دا كان عبارة عن أخطاء أنا أرتكبتها ومسببالى ألم دلوقتى وإحساس بالذنب وكمان نظرة الناس ليا مش تمام ...
نقوله مشكلتك سهلة جدا .. أولا أنت مشاكلك أيا كانت غلطت فيها فى حق نفسك وفى حق الله عز وجل وفى حق شخص أو مجموعة أشخاص .. غلطتك فى حق نفسك هتصلحوا بإصلاح علاقتك بالله وبالناس ... عايزك تعرف ودا جزأ من الإيمان (قل يا عبادى الذين أسرفوا على انفسهملا تقنطوا من رحمة الله إن الله يغفر الذنوب جميعا ) الله .. شوفوا ربنا بيكلمكم بيقولكم ما تيأسوش بس أنت توب لله وهو سبحانه هيسامحك ... مش كدا وبس شوفت كمان ربنا بيقول إيه سبحانه وتعالى (( والذين لا يدعون مع الله إله آخر ولا يقتلون النفس التى حرم الله إلا بالحق ولا يزنون ومن يفعل ذلك يلق أثاما ، يضاعف له العذاب يوم القيامة ويخلد فيه مهانا، إلا من تاب وآمن وعمل عملا صالحا فأولئك يبدل الله سيئاتهم حسنات ))
شفت الجمال .. قول سبحان الله والحمد لله ولا إله إلا الله والله أكبر ... ربنا كريم جدا وغفور رحيم .. أوعة تظن أن ذنوبك أو أخطائك مهما كبرت ممكن تمنعك من رحمة الله.. يبقى خطأك فى حق الله هتمسحوا وتحولوا لحسنات بالتوبة لله ... وخطأك فى حق الناس .. لازم ترجع لكل واحد أذيته بأى شر وتعتذرله وتكسر نفسك وغرورك .. وروح وقول أنا آسف .. كام مرة ضيعت سعادتك عشان رفضت تعتذر وانت متأكد إنك غلطان ..الأسف بيريح جدا والتسامح من أجمل الأحاسيس اللى بتحقق السلام الداخلى وبتوصلك للسعادة فى اقصر فرصة ... وخلينى هنا آخد فاصل وأقولك أقعد مع نفسك لمدة خمس دقايق وشوف أنت بتكره مين وأسأل نفسك الكراهية دى مين اللى خسران بيها .. هتلاقى نفسك أكبر خسران ... إيه رأيك تشيل حاجة من موانع السعادة .. الكراهية والحقد .. إمسح من قلبك كل كره .. وامسح من قلبك كل سوء ... ياللا حاول وهتنجح ... بس قرر أنك فعلا تتخلص من كل المشاعر السلبية اللى جواك ( فإذا الذي بينك وبينه عداوة كأنه ولى حميم ) يبقى راضي الناس وامسح من قلبك الكراهية... وقولى ... هتستفيد إيه لو كرهت أكتر وأكتر واكتر أو كنت مزعل ناس كتير جدا .. ولا حاجة .. بالعكس هتخسر كتير أوى أوى ... عشان كدة .. ياللا حالا أتخلص من مشاعرك السلبية ... بالتوبة ... بإرضاء الناس اللى انت زعلتهم ... بالسماح ... وافتكر ان طاقة التسامح من أقوى الطاقات اللى ممكن تدفعك للسعادة والنجاح ... وكدة يبقى ماضيك جزأ كبير جدا منه أصبح نقى ورائع ومستعد لتدعيم حاضر رائع ومستقبل أروع
ـ ولو افعال زمان دى سابت عنك صورة سلبية عند الناس ودا عائق ليك لأنك كل ما تجاول تظبط نفسك يقوم الناس يرجعوك بصورتهم الذهنية عنك .

عايز أقولك هنا قاعدة .. أول ما هتغير أفعالك .. وتصبر وقت بسيط جدا .. فورا هتلاقى قناعات الاس اتغيرت عنك ... خد المثل دا .. لو واحد بيشرب مخدرات وبيعمل كل المنكرات .. والناس كلها بتلعنه ومرة واحدة لقيته جنبك فى صلاة الفجر فى المسجد واقف بخشوع لله بيصلى .. وبعدين لقيته فى الضهر والعصر والمغرب والعشا .. وبعدين لقيت صوته هدى وأخلاقه اتغيرت .. وباة عنده ابتسامة رائعة ... ها هتدنك تعاملوا بنفس الطريقة لمدة أد إيه ؟؟؟؟؟

دى الإجابة .. غير .. تتغير الدنيا ... لو عندك أى انطباع سلبي عند حد ... بس غير تفكيرك وتصرفاتك واصبر شوية ... هتلاقى الخير كله إن شاء الله

بس ما تنساش .. مش مهم الكلام عجبك .. ومش مهم قريته 10 مرات .. المهم انك تنفذه وتغير تفكيرك .. وتغير سلوكك .. تقوم نتايجك تتغير .. وحياتك كلها تتغير ...

وخليك معايا فى طريق السعادة ...

طيب نعمل إيه لو آثار الماضي بتلاحقنا لحد دلوقتى ... يعنى مثلا الماضي كان فيه خطأ معين انا بارتكبه .. ودلوقتى أنا لسه مستمر ...
وهنا الحل فى منتهى السهولة ... فورا تاخد قرار إنك تقفل كل حاجة سلبية أنت بتعملها ..كل ما بتزود سلبياتك بترجع لورا .. طيب تبطل إزاى .. أول حاجة لازم تغزى إدراكك يعنى تقرا كتير عن الفعل السلبي دا وعن أضراره أو تاخد دورة .. أو تخلى حد يكلمك كتير كتير عن الموضوع دا .. شوية وهتلاقى نفسك إتولد عندها دافع من كتر الإلحاح إنها تمنع الفعل السلبي دا من التكرار .. تقوم واخد القرار وتصبر عليه ... هتتغير وهتبقى شخص رائع وأول ما تاخد الخطوة دى ... حياتك كلها هتختلف تماما ولو مصحوبة الخطوة دى بقناعة .. هتحصل على سعادة مش ممكن تلاقيها فى حته تانية ...

طيب لو أثر الماضى مستمر رغم عنى حتى الآن وممن يكون حاجة مش ليا ذنب فيها..
مرض مثلا أو حد أتعرض لحادث وساب فيه أثر كبير ممكن يكون مثلا إتبتر أحد أقدامه مثلا ... او أى أثر مهما كان صعب ويصعب أو يستحيل محوه
ساعتها لازم تتقبل نفسك زى ما انت .. ولازم تواجه الدنيا بكل طاقة وقوة .. عشان دا قدر ربنا واحنا لا نملك مع قدر ربنا إلا أننا نرضى وبعدين نقدر قيمة الهدية لأن دى هدية من ربنا وثوابها عظيم جدا يوم القيامة ... إرضى بما قسمه الله لك ... إرضى ..وبعدين لو ما رضيتش إيه ممكن يحصل غير أنك هاتكون فى قمة التعاسة .. طيب لو رضيت؟؟ هتبقى مطمئن وسعيد وهتبقى دايما فى احسن حالاتك .. واستخدم الأثر دا لصالحك ..زى واحد من الناس الأغنياء اللى جاله شلل أطفال .. غير مسار حياته تماما بعد لما كان إنسان أناني ومتغطرس .. بأة صاحب أكبر مؤسسة لرعاية مرضى شلل الأطفال ...
وناس كتير جدا كدا .. كان فى طفل صغير عنده 7 سنين بس وبعدين جاله سرطان ... كان سبب نجاح ليه كبير لأنه كتب كتاب كيف تحارب السرطان فى سن صغيرة .. الكتاب دا اتباع منه 7 مليون نسخة حول العالم واترجم لتسع لغات ... فقدر الهدية واحمد الله وارضى وربنا سبحانه وتعالى بيقول (( ولإن شكرتم لأزيدنكم )) وصدقنى مع الرضا ... هتلاقى أكبر معانى السعادة .. ومن غير الرضا .. مش هتحصل على شيء .. فضلا عن أنك هتكون أتعس واحد فى الدنيا ... وافتكر باستمرار أن دايما الحياة بتستمر .. وما بتوقفش أبدا لحد او لمشكلة .. أوعة تقف أنت كمان .. أصل يفوتك القطر ... قطر الحياة

لوطبقت الاستراتيجيات الذهنية اللى احنا قولنا عليها يبقى أنت خلصت تنقية ماضيك ..وماضيك هيبقى من اللحظة دى عبارة عن رصيد عظيم ورائع من الخبرات والتجارب والمهارات اللى هتساعدك توصل بكل سرعة وقوة للنجاح وللسعادة
ــ ممكن يكون حد عنده استثناء من الحاجات دى عنده حبل متين مش عارف يفكه .. دا زى ما قولت هيكون استثناء وممكن يتواصل معايا وإن شاء الله يضيفلى خبرة وانا إن شاء الله عندى الحل

ـ لكن عموما الكلام دا ينطبق على حوالى 98% من الناس عشان كدا فك حبالك عشان نتحرك

وافتكردايما
واحفظ الجملة دى دايما
أن الماضي مهما كان يحوى من الإحباطات والآلام والتحديات ... فإنه يظل ماضي .. يكفى ما سببه لنا من الآلام .. وعليك ألا تجعله سبب فى تدمير حاضرك ومستقبلك
واربط حزامك واطلع معايا للحاضر مليان حماس ... وبكل طاقة الماضى الرائع
نتحرك ناحية الحاضر ...
وخليك معايا مركز دايما فى طريق السعادة ...

خلونى هنا آخد فاصل
وآخد رأيك فى اللى فات وتقييمكم الصادق
وهل نكمل ؟؟
وللا لاء مش لازم ؟؟؟
وللا الاول ممكن نعمل يوم حوارى على الدردشة حوالين الماضى وبعدين ندخل فى الحاضر ؟؟؟

مستنى ردودكم واستفسارتكم واسهامتكم
ودمتم بود

مشرف عدد المساهمات : 836 تاريخ التسجيل : 17/09/2010

ايه ده كله
هوه انا كنت فى غيبوبة ولا ايه ؟!!!
ههههههههههههههههههههههههههه
شوية بقا اجيب الموضوع من الاول والحقكوا
ربنا معايا
بالراحة شوية

مشرف عدد المساهمات : 836 تاريخ التسجيل : 17/09/2010

وخلينى هنا آخد فاصل وأقولك أقعد مع نفسك لمدة خمس دقايق وشوف أنت بتكره مين وأسأل نفسك الكراهية دى مين اللى خسران بيها .. هتلاقى نفسك أكبر خسران ... إيه رأيك تشيل حاجة من موانع السعادة .. الكراهية والحقد .. إمسح من قلبك كل كره .. وامسح من قلبك كل سوء

دى صعبة اوى يا استاذ مصطفى
القرارنفسه صعب
ممكن يكون ضعف منى
بس الواحد فى حاجات بيحس انه لا يمكن ينساها
ممكن يعديها بس لا يمكن انه يسامح

لؤلؤة عندك حق ممكن يكون النسيان صعب والسماح أصعب .. لكن خلينى افكرك .. هو مين خسران بالكره دا .. الشخص المكروه ... وللا انتى .. ها أكيد أنتى ؟؟ طيب بس الموضوع مش سهل أيوة ومين قال إنه سهل ... لكن بالاستعنة بالله وتذكر الآية اللى بتوصف الناص أصحاب الجنة والمتقين بانهم ( والكاظمين الغيظ العافين عن الناس والله يحب المحسنين )) وااختارى انتى باة اللى انتى عايزاه

تعب الدنيا
وللا راحة الدنيا والآخرة ... لكن أنا معاكى طبعا غن فيه حاجات ما تتنسيش ... وخاصة اللى متعلقة بالين ... ساعتها نرجع لمبدأ الحب فى الله والبغض فى الله .. يعنى مش أكره الشخص .. اكره فعله أو أفعاله لأنها ضد الله ... ودا هيفيدنى لأنه مش هيخلينى أعمل الأفعال دى أبدا لأنى بكرهها

ودا سهل إن شاء الله بس انتى ما تحكميش على نفسك إنك ما تقدريش ... وما تعمميش
هتلاقى الموضوع سهل اوى والله

ودمتى بود وسعادة

توماس أديسون قبل مايخترع المصباح حاول على أقل الآراء 458 مرة فسألوه انت إزاى قدرت بعد فشل 458 مرة انك تنجح ..

لا تعليق .... Smile

احنا بس نحاول مرتين تلاتة ع الأقل ...
صــــــــــــعبة أوى ...

أن الماضي مهما كان يحوى من الإحباطات والآلام والتحديات ... فإنه يظل ماضي .. يكفى ما سببه لنا من الآلام .. وعليك ألا تجعله سبب فى تدمير حاضرك ومستقبلك
واربط حزامك واطلع معايا للحاضر مليان حماس ... وبكل طاقة الماضى الرائع
نتحرك ناحية الحاضر ...

يـــــــــــــــــــــــا مسهل ...
معاك .. وربنا المعين .. Smile

(قل يا عبادى الذين أسرفوا على انفسهم لا تقنطوا من رحمة الله إن الله يغفر الذنوب جميعا )

لا إله إلا الله ... Smile

)

وللا الاول ممكن نعمل يوم حوارى على الدردشة حوالين الماضى وبعدين ندخل فى الحاضر ؟؟؟

من رأيى ده ضرورى اوى ...

وربنا يجازيك عنا كل خيـــــــر ... Smile

رحيق الجنة ... باسجل إعجابى على ملاحظاتك .. وان شاء لله ممكن يوم الاحد القادم يكون الحوار على الدردشة بتاعة المنتدى

ودمتى بود

جزاك الله خيراا

دائما مبدع ربنا يبارك فيك يارب

اجمل جملة

وافتكردايما

أنالماضي مهما كان يحوى من الإحباطات والآلام والتحديات ... فإنه يظل ماضي.. يكفى ما سببه لنا من الآلام .. وعليك ألا تجعله سبب فى تدمير حاضركومستقبلك
واربط حزامك واطلع معايا للحاضر مليان حماس ... وبكل طاقة الماضى الرائع
نتحرك ناحية الحاضر .

من اروع الكلام لي يدي اكبر طاقة للمستقبل
نفعنا الله بعلمك وجزاك الله عنا خير الجزاء

وننتظر وكلنا حمااااس لوصول لطريق السعادة
بارك الله فيك
..

اهلا دينا نورتى الموضوع ... إيه فينك من زمان ...دا انا قولت زعلانة مننا وللا حاجة

وربنا ينفعنا كلنا ببعض

وتحياتى على مرورك اللى أسعدنى جامد جدا

وربنا يهدينا كلنا للسعادة

ودمتى بود وخير وسعادة

» مواطن السعادة
» كتب التنمية البشرية